თბილისი (GBC) – საბანკო სისტემა არის საკრედიტო ინსტიტუტი და არა საინვესტიციო და ნუ მოვთხოვთ მას ყველაფრის დაფინანსებას - ბანკირები   საბანკო სექტორის მიმართ ფინანსთა მინისტრის კრიტიკას პასუხობენ.

ქვეყნის უმსხვილესი ბანკის დამფუძნებელი მამუკა ხაზარაძე ამბობს, რომ რეგიონში, ყველა რისკის  გათვალისწინებით, საქართველოში ყველაზე დაბალი საპროცენტო განაკვეთებია.

„ სამწუხაროა ის ფაქტი, რომ არ არსებობს ალტერნატიული დაფინანსების მექანიზმები. ძალიან სამწუხაროა, რომ საქართველოს ეკონომიკის განვითარება დამოკიდებულია მხოლოდ საბანკო სექტორზე, ძალიან სამწუხაროა, რომ არ არის განვითარებული კაპიტალის ბაზარი, ძალიან სამწუხაროა, რომ არ არის საფონდო ბირჟა და ეს რეალობაა“, - ამბობს ბიზნესმენი და იმედს გამოთქვამს, რომ დაანონსებული რეფორმებით, ბიზნესის დაფინანსების ალტერნატიული წყაროები. 

მამუკა ხაზარაძემ საბანკო სექტორის როლზე გაამახვილა ყურადღება, აღნიშნა, რომ თიბისი ბანკს მსოფლიოს 5 კონტინენტიდან ჰყავს მოზიდული ინვესტორები და მხოლოდ მცირე და საშუალო ბიზნესის დაკრედიტებისთვის  3.5 მლრდ ლარი აქვს მიმართული.