თბილისი (GBC) - საქართველოს ჯანდაცვის  ჯგუფმა I კვარტალში მიღებულ მაღალ მოგებაზე განაცხადა.

სამედიცინო და ფარმაცევტული სერვისების მიმწოდებელმა ჯგუფმა იანვარ-მარტში 16 მლნ ლარის მოგება მიიღო, 23%-ით მეტი, გასული წლის 13,1 მილიონიან მაჩვენებელთან შედარებით.

ამონაგები წლიურ ჭრილში 11%-ით, 207,7 მილიონამდეა გაზრდილი. მათ შორის, ჯანდაცვის სერვისებიდან შემოსავალი 10.9%-ით 73.5 მილიონამდე გაიზარდა. მენეჯმენტი მიღწეულით კმაყოფილია  სახელმწიფოს მიერ „საყოველთაო დაზღვევის“ პროექტში განხორციელებული ცვლილებების ფონზე.

უფრო კარგ ზრდას აჩვენებს ფარმაცევტული ბიზნესი, სადაც  14% -იანი ზრდაა და 126.9 მლნ აღწევს, რაზეც გავლენა მოახდინა სააფთიაქო ქსელის გაფართოებამ და გაყიდვების ახალმა სტრატეგიამ.

უარყოფითია სამედიცინო დაზღვევის ბიზნესის მაჩვენებლები. I კვარტალში, მოზიდული პრემიების პორტფელში  კლებაა 4.7%-ით, 14 მილიონამდე.  

ანგარიშში GHG გენერალური დირექტორი ამბობს, რომ განვითარების გზაზე რთული პერიოდის დიდი ნაწილი გადალახულია და კომპანია ელის ყველა ბიზნეს-მიმართულებაში ზრდას, ამასთან მიიჩნევს, რომ არის ეფექტიანობის გაუმჯობესების შესაძლებლობაც.