თბილისი (GBC) - ჩინური ინვესტიციით დაფუძნებული ახალი ავიაკომპანია  Myway Airlines -ი ავიაკპარკის გაფართოების გეგმაზე აცხადებს.

გეგმაზე კომპანიის ფინანსურმა დირექტორმა  იგორ აფციაურმა  AviaNews -ს განუცხადა.

აფციაურის თქმით, ავიაკომპანიის საკუთრებაშია 2, Boeing-737 ტიპის  თვითმფრინავი , რომლის შესაძენად 50 მილიონი დოლარის ინვესტიცია განხორციელდა. 2019 წელს კიდევ ორი ბორტის დამატება იგეგმება.

„5 წლის განმავლობაში ყოველ წელს ავიაპარკს მინიმუმ 2 ბორტით შევავსებთ. ჩვენი განვითარების 3 ეტაპიანი გეგმის მესამე ეტაპისთვის გვინდა გვყავდეს 10 საჰაერო ხომალდი, თუმცა მეათე ბორტი აუცილებლად იქნება Boeing 777. Boeing 777-ით ფრენების დაწყება ჩვენი ქვეყნისთვის ისტორიული მომენტია, რადგანაც დღემდე საქართველოდან, ან საქართველოს მიმართულებით ასეთი ბორტით რეგულარული რეისი არავის განუხორციელებია. ასე რომ, Myway Airlines-ს დიდი და ამბიციური გეგმები აქვს“, - ამბობს აფციაური.

ამ დროისათვის ავიაკომპანია სამ რეგულარულ რეისს ახორციელებს – თბილისი-ხარკოვი-თბილისი, ბათუმი-ხარკოვი-ბათუმი და თბილისი-თელ ავივი-თბილისი. ასევე იწყებს ფრენებს ევროპის მიმართულებით, რისთვისაც შესაბამისი ლიცენზია უკვე მიღებული აქვს. წელს 5 ევროპული მიმართულების დამატება იგეგმება, ჯამში, წელს Myway Airlines-ი 10 მიმართულებით განახორციელებს ფრენას.

კიდევ ერთი სამიზნე ბაზარი აშშ-ია, თუმცა, როგორც კომპანიის ტოპ-მენეჯერი განმარტავს, მიზნის მისაღწევად Boeing 777-ი და ამერიკული ლიცენზიაა საჭირო, რასაც 2 წელი დასჭირდება.