თბილისი (GBC) - GIG -ის წევრი „საქართველოს ენერგეტიკული კორპორაციის“ ხელმძღვანელი მიიჩნევს, რომ ენერგეტიკის სექტორის განვითარებისთვის მხოლოდ  თავისუფალი საინვესტიციო გარემო საკმარისი არ არის.

ლევან ვეფხვაძე საქართველოში ენერგომატარებლებზე გაზრდილ მოთხოვნაზე აკეთებს აქცენტს, რომლის დასაკმაყოფილებლად ახალი სიმძლავრეების გაშვებაა საჭირო.

„გვჭირდება მთავრობისა და კერძო ბიზნესის ინტენსიური მუშაობა, რომ ეს ინვესტიციები (ენერგეტიკის სექტორში) იყოს შემდგარი და ეკონომიკურად მიზანშეწონილი. ენერგეტიკა არის გრძელვადიანი ინვესტიცია,  ეს არის ათწლეულების ინვესტიცია და ინვესტორს თუ არ ექნება გარანტია, რომ იმ ელექტოენერგიას, იმ ჰესით რომელსაც ააშენებს გაყიდის, ბუნებრივია, ის ინვესტიციას არ განახორციელებს“, - ამბობს ლევან ვეფხვაძე.

მისი თქმით, უნდა შეიქმნას ისეთი საინვესტიციო გარემო, სადაც ინვესტორებს ექნებათ ძალიან დიდი მოტივაცია, მონაწილეობა მიიღონ  ელექტროობიექტების მშენებლობაში.

ლევან ვეფხვაძეს  დღეს,  მთავრობის მხრიდან ბიზნესზე შესაძლო ზეწოლაზეც გააკეთა კომენტარი, თქვა, რომ მსგავსი ტიპის ზეწოლაზე კომპანიაში ინფორმაცია არ აქვთ.