თბილისი (GBC) - თიბისი ბანკმა ახალი სათავო ოფისის მშენებლობა დაიწყო. 

თბილისის ბიზნეს ცენტრი - ასე ერქმევა ახალ კომპლექსს, რომლის დიზაინი შატილის ინსპირაციით შეიქმნა. კომპლექსი ენერგოეფექტური და ინოვაციური ტექნოლოგიებით აშენდება. 

პროექტის ავტორი ჰოლანდიელი არქიტექტორი ფრანს ვან ვუურეა, რომელიც UN Studio-ს წარმოადგენს.  კომპლექსს  "სიემსი ჯგუფი"  ააშენებს. 

"დღეს, 17 დეკემბერს,  თიბისი ჯგუფი გახდა  27 წლის და თიბისი ბანკი კი, 26 წლის", - თიბისის დამფუძნებელმა მამუკა ხაზარაძემ ახალი კომპლექსის მშენებლობა გუნდის მიმართ მადლობით დაიწყო, აღნიშნა, რომ  მსოფლიოში ნაკლებად მოიძებნება თიბისის მსგავსი პრეცენდენტი, როცა ადამიანები 26 წლის განმავლობაში წარმატებულ ისტორიას ქმნიან   და  ინარჩუნებენ ერთობას.  

"ეს პროექტი რომელიც აქ აშენდება იქნება არ მხოლოდ თანამედროვე, რეგიონში ყველაზე კარგი, ეკო და განახლებადი ენერგიის მქონე,  არამედ  ეს იქნება ადგილი, რომელსაც ერქმევა თბილისის ბიზნეს ცენტრი და აქ ძალიან ბევრი ახალგაზრდა, სტარტაპერი ნახავს თავის საინტერესო ადგილს", - აღნიშნა ხაზარაძემ.