თბილისი (GBC) - Bloomberg  -მა უმდიდრესი ბრიტანელის ტიტული ჯეიმს დაისონს მიანიჭა.

მტვერსასრუტების  და მტვერსასრუტი რობოტების მწარმოებელი Dyson Ltd -ის 71 წლის  დამფუძნებლის ქონება წლის დასაწყისიდან 4.52 მლრდ დოლარით გაიზარდა, მათ შორის მხოლოდ 1 დღეში 3.41 მილიარდით.

ახალა დაისონის ქონება 13.8 მილიარდია (Forbes-ის შეფასებით კი, მხოლოდ 5.6 მლრდ), რაც 700  მილიონით აღემატება რეიტინგის წინა ლიდერის ჯიმ რეტკლიფის ქონებას (13.1 მლრდ). ეს უკანასკნელი ქიმიური ჰოლდინგ Ineos -ის მფლობელია.

დაისონს ასეთ მკვეთრ გამდიდრებას Bloomberg-ი Dyson Ltd  -ის რეკორდულ მაჩვენებელებს უკავშირებს. კომპანიის ბრუნვა 2018 წელს 28%-ით, 4.4 მილიარდ ფუნტამდე გაიზარდა, მოგება კი, 1.1 მილიარდ ფუნტამდე, რაც 33%-იან ზრდას აჩვენებს.

უმდიდრესი ბრიტანელების რეიტინგში მესამე ადგილზეა ჰიუ გროსვენორი, ვესტმინსტერის მე-7 ჰერცოგი. მისი ქონება 12.4 მილიარდია. პორტფელი ძირითადად უძრავი ქონებით არის შევსებული. 2018 წლამდე ჰიუ გროსვენორი გაერთიანებული სამეფოს უმდიდრეს ადამიანად იყო მიჩნეული.