თბილისი (GBC) -  ქართული „დელტასა“ და ავსტრიული „როზენბაუერის“  სახანძრო და სამაშველო ავტომობილების პირველი პროტოტიპების წარდგენა 2019 წელს მოხდება.

როგორც GBC -ს „დელტაში“ განუცხადეს სამმხრივი პროექტი აქტიურ ფაზაშია. პროექტის ფარგლებში სახანძრო და სამაშველო აღჭურვილობის მწარმოებელი ავსტრიული კომპანია სუპერსტრუქტურას ქმნის, დელტა კი, ამ პროექტში შასების გაძლიერების მიმართულებით ჩაერთო.  

„აღნიშნული შასები ამ ეტაპზე გაგზავნილია ავსტრიაში, სადაც „დელტას“ კვალიფიციურ პერსონალთან ერთად  მიმდინარეობს სუპერსტრუქტურის მონტაჟი. პროექტის შემდეგ ეტაპს წარმოადგენს მანქანის საბოლოო დამამთავრებელი სამუშაოები დელტაში,  საგანგებო სიტუაციების მართვის სამსახურის მძღოლთა გადამზადება და საბოლოო მიმღებისთვის დასრულებული პროდუქტის გადაცემის პროცედურების განხორციელება“, - აცხადებენ ცენტრში.

როგორც ცნობილია, პროექტი საგანგებო სიტუაციების მართვის სამსახურის დაკვეთით, დელტას საწარმოო ბაზაზე სახანძრო და სამაშველო აღჭურვილობის მწარმოებელ უმსხვილეს ავსტრიულ კომპანია როზენბაუერთან თანამშრომლობით ხორციელდება.