თბილისი (GBC) - მაგთიკომმა უახლესი ტექნოლოგია eSIM (Embedded SIM - იგივე "ჩაშენებული ბარათი") დანერგა, პირველმა საქართველოში.

eSim მობილური მოწყობილობის ძირითად მიკროსქემაზე მიმაგრებული მიკროჩიპია ( 6 მმ სიგრძის და 5 მმ სიგანის მართხკუთხედი),კლასიკური Sim ბარათის ფუნქციით.

GSMA (eSim-ის სტანდარტის შემქმნელი, მისი მხარდამჭერი ინფრასტრუქტურის და ეკოსისტემის ოპერატორი) აღნიშნავს, რომ Sim-ი არ ქრება  და მისი როლი მობილურ კავშირგაბმულობაში იგივე რჩება. იცვლება მხოლოდ ფიზიკური ფორმა და შესაბამისად, იმ წესებისა და პროცედურების ნაწილი, რომელიც უწინ პლასტმასზე დატანილი Sim-ების დამზადების, პერსონალიზაციის, გავრცელებისა და შემდგომში მართვისთვის გამოიყენებოდა.

eSim-ით აღჭურვილია მაღალტექნოლოგიური მოწყობილობები; iPhone Xr, iPhone Xs, iPhone Xs Max, Google-ის Pixel 3 და Pixel 3 XL. გარდა ტელეფონებისა, eSim ინტეგრირებულია Apple Watch Series 3, Apple Watch Series 4 და Samsung Gear S3 "ჭკვიან საათებში".

მაგთიკომის განცხადებით, eSIM-ის მხარდაჭერა აქვს საქართველოში Apple-ის ოფიციალურ რესელერებთან შეძენილ შემდეგ უახლეს მოდელებს: iPhone XR , iPhone XS, iPhone XS MAX, თუმცა, eSIM-ის მხარდაჭერა შესაძლოა, ჰქონდეს სხვა მოდელებსაც, კონკრეტულ მწარმოებლებთან დაზუსტებით.

eSIM-ის გააქტიურება  SIM ბარათთან ერთადაც შესაძლებელია და შესაბამისად, 2 ნომრით ერთდროულად სარგებლობა. eSIM-ს  ოპერატორისგან ერთჯერად QR კოდით  გაიაქტიურებს.

eSIM-ით თითოეული სააბონენტო ნომრის ქსელში ჩართვის ღირებულება - 10 ლარია, არსებული აბონენტისთვის სიმ ბარათის eSIM-ით შეცვლის ღირებულება - 10 ლარი, eSIM-ის დაზიანების/წაშლის შემთხვევაში, eSIM-ის შეცვლის ღირებულება - 5 ლარია.