თბილისი (GBC) - კონომიკის სამინისტრომ მშენებლობის სექტორის შრომის ბაზრის ანალიზი წარადგინა. ეს პირველია, სამშენებლო სექტორზე მსგავსი კვლევა არ გაკეთებულა.

კვლევის შედეგებით, 2019 წლის 1 სექტემბრის მდგომარეობით სექტორში დასაქმებულთა საერთო რაოდენობამ 81,373 პირი შეადგინა, რაც წინა წლის ანალოგიურ მაჩვენებელს 10,3%-ით აღემატება. დასაქმებულთა 94,4% სრულ განაკვეთზე, ხოლო 5,6% არასრულ განაკვეთზე დასაქმებულებს წარმოადგენენ.  50.5% მცირე, 31.9% საშუალო, ხოლო 17.5% მსხვილ საწარმოზე მოდის.

საწარმოთა 5%-ს (224 საწარმო) ჰყავს უცხო ქვეყნის მოქალაქე დასაქმებული, ჯამში 2,737 ადამიანი, რაც მთლიანი დასაქმების 3,4%-ია; დასაქმებულ უცხოელთა რაოდენობა (2,737) წინა წლის ანალოგიურ მაჩვენებელზე 11%-ით ნაკლებია. შემცირება მთლიანად რეგიონების ხარჯზეა. ხოლო თბილისში მათი დასაქმების მაჩვენებელი მცირედით, თუმცა, მაინც გაზრდილია. 

საწარმოთა 7% აპირებს სამუშაო ძალის გაზრდას 2,730 -ით. მსხვილ საწარმოებში მუშახელის რაოდენობის გაზრდა იგეგმება 360 პირით (1 საწარმოში საშუალოდ 51 დასაქმებული), საშუალო საწარმოებში 417-ით (საშუალოდ 13 დასაქმებული), ხოლო მცირე საწარმოებში 1,953 დასაქმებულით (საშუალოდ 8 დასაქმებული).

მნიშვნელოვნად განსხვავებულია შრომის ანაზღაურების საშუალო მაჩვენებლები საწარმოთა ზომის მიხედვით. მშენებლობის მენეჯერების საშუალო თვიური ანაზღაურება მსხვილ საწარმოებში 4,036 ლარია, რაც 22%-ით მეტია საშუალო ზომის საწარმოებში დასაქმებული მშენებლობის მენეჯერების საშუალო ხელფასზე. თავის მხრივ საშუალო ზომის საწარმოში დასაქმებული მენეჯერების ხელფასი 112%-ით აღემატება მცირეს.