თბილისი (GBC) - BMatch-ზე მოვაჭრეები ზედამხედველისგან წესების გამოქვეყნებას ელოდებიან, რომლითაც 1 ოქტომბრიდან უნდა იხელმძღვანელონ.

ამ დროისთვის Bloomberg-ის მოედანზე (რომლის პლატფორმაც არის სებ-ის პრეზენტირებული BMatch-ი) 1 არარეზიდენტია ( აშშ-ის საინვესტიციო ფონდი), 15 კომერციული ბანკი, 4 მისო და ტელესაკომუნიკაციო ბაზრის 1 ოპერატორი. თუ ლიბერთის 30.7% ბენეფიციარი მესაკუთრის - ირაკლი რუხაძის გია ჯოხთაბერიძესთან მინორიტარ პარტნიორობას (54/46%) გავითვალისწინებთ, მოედანს მე-2 უმსხვილესი ოპერატორიც "მაგთი" უყურებს.

იანვარ-მაისში (იანვარ-ივნისის სტატისტიკა ივლისის ბოლოს დაიდება) კომერციულ ბანკებს $12 მლრდ-ზე მეტი აქვს გაყიდული და აქედან $4 მლრდ -ზე მეტი სპოტ გარიგებებია - ინსტრუმენტი, რომელიც BMatch-ზე გამოიყენება.

ამ დროისთვის ყველა მოვაჭრეს, საფინანსო კომპანიებს (ბანკი, მისო, ბროკერი) არარეზიდენტ ფონდს და საკომუნიკაციო კომპანიას თითო სადილინგო კოდი აქვს (ბლუმბერგის სისტემაში დაშვების ფასი თვეში $1 970 -ია). 1 ოქტომბრიდან კი საფინანსო კომპანიები (ბანკი, მისო, ბროკერი) BMatch-ზე 2 კოდით ივაჭრებენ, თავისთვის და თავისი კლიენტისთვის (საბროკერო კოდით). სხვა კლიენტების მომსახურებას ბანკს ვაჭრობის წესები ავალდებულებს.

ექსპერტები აღნიშნული მოედნით სავალუტო ჯიხურების შევიწროებას ელიან. რადგან ვალუტის ქუჩის გადამხურდავებლები მსხვილ ტრანზაქციებს დაკარგავენ. BMatch-ზე მინიმალური ტრანზაქცია $100 000 -ია. მოთხოვნის გათვალისწიებით ამ დროისთვის ₾/$ -ის გარდა სხვა წყვილები გარიგებებში არ მონაწილეობს.