თბილისი (GBC) პანდემიასთან დაკავშირებული ეკონომიკური კრიზისის, ტურისტული სეზონის ჩაშლის და ეკონომიკის სხვა სექტორებში ვარდნის მიუხედავად, ფასები საქართველოში კვლავაც ზრდას განაგრძობს.

2019 წლის ანალოგიურ პერიოდთან შედარებით გაძვირდა ყველაფერი - ზრდა არა მხოლოდ სასიცოცხლოდ აუცილებელ საქონელს შეეხო, არამედ სხვა პროდუქციას, მათ შორის ისეთს, რომელიც აუცილებელი არაა.

2019 წლის აგვისტოსთან შედარებით ფასი ყველაფერს მოემატა - კვების სურსათით დაწყებული,  ავეჟით, და საყოფადცხოვრებლო ტექნიკით დასრულებული. საშუალოდ ფასები 4,5%-დან 18%-მდე გაიზრდა.

2020 წლის აგვისტოში ივლისთან შედარებით ინფლაცია 0,02%-ით შემცირდა, თუმცა, ეს გაუმჯობესება მხოლოდ სეზონურ ხასიათს ატარებს.

საქსტატის ინფორმაციით, თვის მანძილზე გაიაფდა სეზონური სასურსათო პროდუქტები - ხილი (-10,6%), და  ბოსტნეული (2,8%).

თუმცა, იგივე პროდუქტები წინა თვესთან შედარებით  გაიაფების მიუხედავად, წინა წლის ანალოგიურ პერიოდთან შედარებით მაინც გაძვირებული - მაგალითად, ხილი (18%), ყავა, ჩაი, კაკაო (14%).

ამავე დროს ყველა სხვა სასურსათი საქონელი, რომელიც სეზონური არაა, გაძვირდა როგორც 2020 წლის ივლისთან, ასევე 2019 წლის აგვისტოსთან შედარებით  - მაგალითად,  რძის ნაწარმი, ყველი, ხორცი, და კვერცხი.