თბილისი (GBC) - 2020 წლის იანვარ-სექტემბერში საქართველოში საქონლით საგარეო სავაჭრო ბრუნვამ (არადეკლარირებული ვაჭრობის გარეშე) 8,1  მლრდ.  დოლარი შეადგინა, რაც წინა წლის შესაბამის პერიოდთან შედარებით 14.9%-ით ნაკლებია - იუწყება საქსტატი.

აქედან ექსპორტი 2, 4 მლრდ.  დოლარს შეადგენს (-12.1%), ხოლო იმპორტი 5, 7 მლრდ. დოლარს (- 15.9%).

საქართველოს უარყოფითმა სავაჭრო ბალანსმა, 2020 წლის იანვარ-სექტემბერში, 3,3 მლრდ. დოლარი შეადგინა, რაც საგარეო სავაჭრო ბრუნვის 40.8%.

აღსანიშნავია, რომ უარყოფითი სალდოს ეს მაჩვენებელი ყველა დაბალია 2015 წლიდან კერძოდ, 2015 წელს ის 3,72 მლრდ. დოლარს შეადგენდა, 2016-ში - 3, 75 მლრდ., 2017-ში - 3,73 მლრდ., 2018-ში - 4,3 მლრდ.., 2019-ში - 4,06 მლრდ. დოლარს შეადგენდა.

უმსხვილესი საექსპორტო სამეული შემდეგნაირად ჩამოყალიბდა: ჩინეთი (355.3 მლნ.  დოლარი), აზერბაიჯანი (327.9 მლნ.  დოლარი) და რუსეთი (308.6 მლნ. დოლარი).

2020 წლის იანვარ-სექტემბერში იმპორტიორი ქვეყნების პირველ სამეულში შედის: თურქეთი (981.6 მლნ.  დოლარი), რუსეთი (626.0 მლნ. დოლარი) და ჩინეთი (509.6 აშშ დოლარი).

2020 წლის იანვარ-სექტემბერში სასაქონლო ჯგუფებიდან საექსპორტო ათეულში პირველი ადგილი სპილენძის მადნებმა და კონცენტრატებმა დაიკავა 541.7 მლნ.  დოლარით, რაც მთელი ექსპორტის 22.5%-სშეადგენს. მეორე ადგილს იკავებს მსუბუქი ავტომობილები 304.2 მლნ.  დოლარით (მთლიანი ექსპორტის 12.7%), ხოლო მესამე ადგილზეა ფეროშენადნობები 180.3 მლნ.  დოლარით (7.5%).

უმსხვილესი საიმპორტო სასაქონლო ჯგუფი 2020 წლის იანვარ-სექტემბერში წარმოდგენილი იყო მსუბუქი ავტომობილების სახით, რომლის იმპორტმა 560.2 მლნ.  დოლარი და მთელი იმპორტის 9.8% შეადგინა. მეორე ადგილს იკავებდა სპილენძის მადნები და კონცენტრატები 415.6 მლნ.  დოლარით (7.3%), ხოლო მესამე ადგილზეა ნავთობი და ნავთობპროდუქტები 366.6 მლნ.  დოლარით (იმპორტის 6.4%).