თბილისი (GBC) - ამერიკის ყველა შტატში ხმის მიცემის პროცესი თბილისის დროით 10:00 საათზე დასრულდა. ბოლო საარჩევნო უბნები სწორედ ამ დროს ალიასკაზე დაიხურა. 

არჩევნების საბოლოო შედეგი ჯერ უცნობია, შტატების უმრავლესობაში ბიულეტენების დათვლა მიმდინარეობს. NBC-ს მონაცემებით, ამ დროისათვის დემოკრატ ჯოზეფ ბაიდენს კოლეგიაში 209 ხმა აქვს, ხოლო მოქმედ პრეზიდენტს, რესპუბლიკელ ტრამპს – 212.

დიდი ალბათობით, ტრამპმა ტეხასში, ფლორიდასა და ოჰაიოში გაიმარჯვა, ხოლო დემოკრატმა ბაიდენმა – არიზონაში. ამ შტატებში ხმათა კმრავლესობა უკვე დათვლილია. სხვა მერყევ შტატებში შედეგების პროგნოზირება რთულია. ფოსტით დაფიქსირებული ხმების დათვლის პროცესი შესაძლოა 3 დღეს გაიწელოს.

ორივე კანდიდატი დარწმუნებულია, რომ გაიმარჯვებს. ბაიდენმა თავის მხარდამჭერებს უკვე მიმართა და მოთმინებისკენ მოუწოდა, ხოლო ტრამპმა „არჩევნების მოპარვის“ მცდელობაში დაადანაშაულა კონკურენტი.

თბილისის დროით 10:36 საათისთვის ბაიდენს 49,86%–მა დაუჭირა მხარი, ხოლო დონალდ ტრამპმა დათვლილი ხმების 48,53% მიიღო.