თბილისი (GBC) - კომპანიების SpaceX და Tesla დამფუძნებელმა ილონ მასკმა მსოფლიოს უმდიდრესი ადამიანების სიაში Facebook-ის დამფუძნებელს მარკ ცუკერბერგს გაუსწრო და მესამე ადგილი დაიკავა. ამის შესახებ სააგენტო Bloomberg-ის მიერ გამოქვეყნებულ რეიტინგშია ნათქვამი (Bloomberg Billionaires Index (BBI)).

ოთხშაბათის ვაჭრობებზე მასკის ქონება $10,2 მლრდ–ით – $120 მლრდ–მდე გაიზარდა. ცუკერბერგმა ერთ დღეში $1 მლრდ–ზე მეტი დაკარგა და მეოთხე ადგილზე ჩამოინაცვლა. დღეის მდგომარეობით მისი კაპიტალი $103 მლრდ–ს შეადგენს.

მოვლენების ასეთი განვითარება Tesla–ს შესახებ ცნობებმა განაპირობა. დეკემბერში კომპანია S&P 500–ის ინდექსში დაემატება. ამ ახალი ამბის შემდეგ, სამშაბათს, კომპანიის აქციების ფასი 8,2%, ხოლო ოთხშაბათს – 10,2%–ით გაიზარდა.  

BBI–ს რეიტინგის პირველი ნომერია Amazon-ის დამფუძნებელი ჯეფ ბეზოსი, რომლის ქონებაც $183 მლრდ–ს შეადგენს. მეორე ადგილს Microsoft–ის დამფუძნებელი ბილ გეითსი იკავებს, თავისი $128 მლრდ–ით.

ამერიკული კომპანია Tesla 2003 წელს დაფუძნდა როგორც ელექტრომობილებისა და მათთან დაკავშირებული ტექნოლოგიების მწარმოებელი.