თბილისი (GBC) - ორშაბათის ვაჭრობებზე ეტალონური მარკების ნავთობის ფასი, დოლარის გამყარების ფონზე მცირდება.

„აშშ დოლარის კურსი პარასკევს ზედიზედ მესამე დღე მყარდებოდა და ეს დინამიკა დღეს დილითაც ნარჩუნდება, რაც ნედლეულის სექტორში ფასების შემცირებას იწვევს“, – განაცხადა Vanda Insights ხელმძღვანელი ვანდანა ჰარი, რომელსაც S&P Global Platts ციტირებს.

თბილისის დროით 10:20 საათისთვის Brent-ის მარკის ნავთობის ფასი, მარტში მიწოდების პირობით, 1.3%–ით არის შემცირებული და ბარელი $55,26 ღირს.

ამერიკული მსუბუქი ნავთობი WTI შედარებით ნაკლებით, 0,88%–ითაა შემცირებული – $51,78–მდე ბარელზე.

8 იანვარს დასრულებული კვირის განმავლობაში ნავთობის ფასი დაახლოებით 8%–ით გაიზარდა.