თბილისი (GBC) - რუსეთის, სომხეთისა და აზერბაიჯანის ვიცე–პრემიერები 27 იანვარს მოსკოვში დაგეგმილ შეხვედრაზე, სამხრეთ კავკასიაში სატრანსპორტო მარშრუტების მშენებლობის საკითხებს განიხილავენ. ამის შესახებ რუსული გამოცემა RBC წერს.

გამოცემის ინფორმაციით, რუსული მხრიდან მოლაპარაკებებში ალეკსეი ოვერჩუკი ჩაერთვება, სომხეური მხრიდან – მგერ გრიგორიანი, ხოლო ბაქოდან – შაჰინ მუსტაფაევი.

RBC–ს მიერ მოპოვებული იფნორმაციის თანახმად, ვიცე–პრემიერებს რამდენიმე მარშრუტის საკითხის განხილვა მოუწევთ, კერძოდ, რკინიგზის მშენებლობა სომხეთის ტერიტორიის გავლით, რომელიც აზერბაიჯანს ნახჩევანის ავტონომიურ რესპუბლიკასთან, ხოლო სომხეთს რუსეთთან დააკავშირებს.

გამოცემის წყარო დასძენს, რომ მხარეები რკინიგზით სომხეთის ირანთან დაკავშირების საკითხსაც განიხილავენ, ნახჩევანის ტერიტორიის გავლით.