თბილისი (GBC) - კომპანია Apple–ის წმინდა მოგება 2020–2021 ფინანსური წლის პირველ კვარტალში, რომელიც 26 დეკემბერს დასრულდა, წლიურ გამოსახულებაში 29,3%–ით გაიზარდა $28,755 მლრდ–მდე.

საანგარიშო პერიოდში კომპანიის შემოსავალი 21%–ით – $111,439 მლრდ–მდე გაიზარდა, როცა ანალიტიკოსები ამ მაჩვენებელს $102,54 მლრდ–იან ნიშნულზე ელოდნენ.

კომპანიის რელიზში ნათქვამია, რომ პირველი კვარტლის შემოსავლები რეკორდულია, ხოლო ამ მაჩვენებელში საერთაშორისო გაყიდვები 64%–ს შეადგენს. Apple–ს შემოსავლების ნახევარზე მეტი iPhone–ის გაყიდვებზე მოდის.

პირველ კვარტალში iPhone–ის გაყიდვები 17%–ით გაიზარდა და $65,597 მლრდ შეადგინა. Mac-ების გაყიდვები პირველ კვარტალში, წლიურ გამოსახულებაში 21%–ით გაიზარდა – $8,675 მლრდ–მდე, ხოლო iPad-ების გაყიდვები სააგნარიშო პერიოდში 1,4–ჯერ არის გაზრდილი – $8,435 მლრდ–მდე.

კომპანია Apple, რომელიც 1976 წელს დაარსდა, პერსონალურ და პლანშეტურ კომპიუტერებს, აუდიოფლეერებს, ტელეფონებს, „ჭკვიან საათებს“ და პროგრამულ უზრუნველყოფებს აწარმოებს.