თბილისი (GBC) - კომპანიამ AstraZeneca ევროკავშირს აცნობა, რომ მეორე კვარტალში კონტრაქტით გათვალისწინებული კორონავირუსის საწინააღმდეგო ვაქცინების ნახევარზე ნაკლებს მიაწვდის, უთხრა სააგენტო როიტერს ევროკავშირის წარმომადგენელმა.

AstraZeneca–ში არ უარჰყვეს ევროპელი მოხელის სიტყვები, თუმცა კომპანიის მიერ გავრცელებულ განცხადებაში ნათქვამია, რომ ყველაფერს აკეთებენ იმისთვის, რათა წარმადობა გაზარდონ და ევროკავშირს დაპირებული 180 მლნ დოზა გადასცენ.

ევროკავშირის წარმომადგენლის თქმით, რომელიც AstraZeneca–სთან მოლაპარაკებებში უშუალოდ მონაწილეობს, კომპანიამ შიდა შეხვედრებზე დაადასტურა, რომ მეორე კვარტალში 90 მლნ დოზაზე ნაკლებს მიაწვდის ევროგაერთიანებას.

ევროკავშირთან გაფორმებული კონტრაქტის თანახმად, რომლის შინაარსმა პრესაში გაჟონა, ინგლისურ–შვედურ ფარმაცევტულ კომპანიას ევროკავშირისთვის ვაქცინები უნდა ეწარმოებინა დიდ ბრიტანეთში მდებარე ორ ქარხანაში და ბელგიასა და ნიდერლანდებში მდებარე ქარხნებში.

თუმცა ამ დროისთვის კომპანია ბრიტანეთში წარმოებული ვაქცინების ექსპორტს არ ახორციელებს, ვინაიდან ოფიციალურ ლონდონთან AstraZeneca–ს ცალკე კონტრაქტი აქვს გაფორმებული, ამბობენ ევროკავშირის ოფიციალური წარმომადგენლები.