თბილისი (GBC) - ზესტაფონის მუნიციპალიტეტის ტერიტორიაზე 50 მგვტ-ის სიმძლავრის ქარის ელექტროსადგურის მშენებლობა იგეგმება. პროექტის განხორციელება შპს "ზესტაფონის ქარის ელექტროსადგური"-ს სურს.

კომოპანიასა და მთავრობას შორის გაფორმებული მემორანდუმი აღნიშნულ ტერიტორიაზე ითვალისწინებს 150 მგვტ-ის სიმძლავრის განვითარებას. პროექტის ფარგლებში დაიგეგმა პირველი ფაზის განხორციელება, რომელიც ითვალისწინებს 50 მგვტ სიმძლავრის ქარის ელექტროსადგურის მშენებლობას.  

 კომპანიამ გარემოს დაცვისა და სოფლის მეურნეობის სამინისტროს უკვე წარუდგინა სკოპინგის ანგარიში, რომლის მიხედვითაც სავარაუდოდ ENERCON-ის მოდელის ქარის 10 ტურბინა დამონტაჟდება.

სკოპინგის ანგარიშის მიხედვით, ზესტაფონის 50 მგვტ-ის სიმძლავრის ქარის ელექტროსადგურის საშუალო წლიური გამომუშავება 162 მლნ კვტ.სთ იქნება.

ცნობისთვის, ამ დროისთვის საქართველოში მხოლოდ ერთი ქარის ელექტროსადგური ფუნქციონირებს, რომლის დადგმული სიმძლავრე 20,7 მგვტ-ს შეადგენს. 2020 წელს ქართლის ქარის ელექტროსადგურმა 90,8 მლნ კვტ.სთ ელექტროენერგია გამოიმუშავა, რაც საქართველოში გამომუშავცებული ელექტროენერგიის 1%-მდეა.