თბილისი (GBC) - 2021 წლის მარტში საცხოვრებელი უძრავი ქონების ტრანზაქციების ზრდის ტენდენცია და ტემპი შენარჩუნებულია. გასული წლის ანალოგიურ პერიოდთან შედარებით, ტრანზაქციების რაოდენობა თბილისში 32%-ით, ბათუმში კი 30%-ითაა გაზრდილი. Colliers International Georgia-ს მონაცემებით, თბილისში, 2021 წლის მარტში 3,060 ტრანზაქცია დაფიქსირდა, რაც წინა წლის მაჩვენებელთან შედარებით 32%-ით მეტია. 2019 წელთან შედარებით კი - 20%-ით. რაც შეეხება ბაზრის ზომას, 23%-იანი ზრდა დაფიქსირდა და მოცულობამ 132 მილიონი აშშ დოლარი შეადგინა.

2021 წლის მარტში, თბილისში ახალაშენებულ პროექტებში 2,021 ტრანზაქცია დარეგისტრირდა, რაც 33%-ით მეტია წინა წლის ანალოგიურ პერიოდთან შედარებით, ხოლო 25%-ით მეტი 2019-თან შედარებით. აღნიშნული შესაძლოა დაკავშირებული იყოს ქალაქის მასშტაბით რამდენიმე მშენებარე საცხოვრებელი ობიექტის დასრულებასთან, რაც ჯამში დაახლოებით 170 ერთეულ ბინას მოიცავს. ძველ პროექტებში კი ტრანზაქციების რაოდენობა 30% და 11%-ით გაიზარდა 2020-სა და 2019-თან შედარებით.

ბათუმში, 2021 წლის მარტში 1,017 ტრანზაქცია დაფიქსირდა, რაც წინა წლის მაჩვენებელთან შედარებით 30%-ით მეტია. 2019 წელთან შედარებით კი - 28%-ით. რაც შეეხება ბაზრის ზომას, 26%-იანი ზრდა დაფიქსირდა და მოცულობამ 41 მილიონი აშშ დოლარი შეადგინა. ახალაშენებულ პროექტებში 849 ტრანზაქცია დარეგისტრირდა, რაც 29%-ით მეტია წინა წლის ანალოგიურ პერიოდთან შედარებით, ხოლო 27%-ით მეტი 2019-თან შედარებით. ძველ პროექტებში კი ტრანზაქციების რაოდენობა 35% და 34%-ით გაიზარდა 2020-სა და 2019 წლებთან შედარებით.