თბილისი (GBC) - საქართველოს გადამცემი ქსელის განვითარების ათწლიანი გეგმის მიხედვით, 2031 წლისთვის ქვეყანაში დღეს არსებული გენერაციის ობიექტების სიმძლავრე 130%-ით უნდა გაიზარდოს.

ამჟამად საქართველოს ენერგოსისტემის დადგმული სიმძლავრე 4533 მგვტ­ია, აქედან ჰესების სიმძლავრეა 3323 მგვტ, 110 მგვტ აირტურბინების, 21 მგვტ ქარის სადგურების, ხოლო კომბინირებული და თბოელექტროსადგურების ­ 1079 მგვტ. დღეისათვის ჯამური დადგმული სიმძლავრის დაახლოებით 74% მოდის ჰესებზე.

2031 წლისთვის საქართველოს ენერგოსისტემის ჯამური სიმძლავრე გაიზრდება 10396 მგვტ­მდე. აქედან 7188 მგვტ იქნება ჰიდროელექტროსადგურების სიმძლავრე, 1330 მგვტ ქარის სადგურების, 520 მგვტ მზის სადგურების, 110 მგვტ აირტურბინების, ხოლო 1248 მგვტ მაღალი ეფექტურობის მქონე კომბინირებული თბოელექტროსადგურების სიმძლავრე, რომლებიც ჩაანაცვლებენ მოძველებულ გარდაბნის N 3, 4 და 9 ბლოკებს. ჰესების წილი ჯამურ დადგმულ სიმძლავრეში 2031 წლისთვის იქნება 69%­მდე.

აღსანიშნავია, რომ საქართველოს გადამცემი ქსელის განვითარების ათწლიანი გეგმა შესასრულებლად სავალდებულო აქტია, მაგრამ ჰესების მშენებლობასთან დაკავშირებით ქვეყანაში არსებული პროტესტიდან და წინააღმდეგობიდან გამომდინარე, გენერაციის განვითარების გეგმა მაღალი ალბათობით ვერ შესრულდება.