თბილისი (GBC) - რატომ არ უნდა ვივაჭრო დოლარით, ხელფასი გავცე დოლარით, მანქანა, ბინა, ტანსაცმელი ვიყიდო დოლარით?, - სებ-ის პრეზიდენტმა, 2020-ის ანგარიშის პარლამენტში წარდგენის შემდეგ, იაგო ხვიჩიას (გირჩი) უპასუხა, რომ  ლარს კანონმდებლობა აღიარებს ერთადერთ საგადამხდელო საშუალებად. ის ანგარიშსწორების ერთეულია. ამასთან სხვა ნებისმიერი ვალუტის ლარში დაკონვერტება და გამოყენებაც შესაძლებელია. 

სებ-ის დაშვებულ შეცდომებზე, რაქვიაშვილის (გირჩი) კითხვაზე გვენეტაძის პასუხის პირველი ნაწილი შეეხო 2020 -ს, უპრეცედენტო შოკებით დახუნძლულ წელს. პერიოდს, როცა ყოველი ნაბიჯის წინასწარ გაანალიზებას პანდემიის გაურკვევლობა ართულებდა. თუმცა მარეგულირებელმა ფინანსური შოკებთან გამკლავებისთვის ფინანსური სექტორი სათანადოდ მოამზადა. რის დასტურადაც, სებ-ის პრეზიდენტმა სსფ-ის, სხვა ავტორიტეტული საერთაშორისო და სარეიტინგო კომპანიების შეფასებები მოიხმო. 

კობა გვენეტაძის პასუხის  თანახმად, სებ-ი 2019  წლის შემოდგომამდე უშეცდომოდ მივიდა და პანდემიის კრიზისის გაურკვევლობის გამორიცხვით, დღემდე უშეცდომოდ მოდის.  თუ არ ჩავთვლით,  30%  სარეზერვო  ნორმის  25%-მდე შემცირების  ლარიზაციის დამაზიანებელ შემოდგომის გადაწყვეტილებას. რასაც სებ-ის პრეზიდენტი ნანობს. 

გახარიასთან კორდინირებული მაშინდელი  ნაბიჯი   გაუფასურებული ლარის ინფლაციაზე წნეხის განეიტრალებას ემსახურებოდა.  ამით კი სებ-ს გრძელვადიან პერიოდზე გათვლილი თავისივე გამკაცრებული ნორმის მოკლე ვადაში შემსუბუქება მოუწია. ბანკების მიერ მოზიდულ სავალუტო რესურსზე  25%-დან 30%-მდე გაზრდილი ნორმა  2 ეტაპად შევიდა ძალაში, +3% (18 აპრილიდან) და +2% (16 მაისიდან). ამასთან 5%-მდე  შემსუბუქდა ლარში.  ამით სებ-ი  "გრძელ ლარს" ახალისებს, სავალუტოს მოთოკვით კი  პირიქით, "გრძელ დოლარს" ამოკლებს.

უცხოურ ვალუტაში მოზიდულ სახსრებზე სარეზერვო ნორმის შემსუბუქება მაშინ, მაშინდელმა პრემიერმა  და სებ-ის პრეზიდენტმა საბანკო სექტორისთვის  $700 მლნ-ის საკრედიტო რესურსის  გაჩენის სიკეთით ახსნეს. რასაც სავალუტო სესხიც უნდა გაეიაფებინა. გააიაფა, მაგრამ $67 000-მდე მსესხებლებისთვის არა (მიმდინარე ფასებში), რადგან სავალუტო დაკრედიტების ₾200 000 ზღვარი არც მოიხსნა და არც დაიწია.