თბილისი (GBC) - ეკონომიკის მინისტრის მოადგილე მარიამ ქვრივიშვილი იმედოვნებს, უნგრული ავიაკომპანია WizzAir-ი ქუთაისის აეროპორტიდან ახალ ავიარეისებს წელს დაამატებს.

ქვრივიშვილი კომპანიის მენეჯმენტთან გამართულ შეხვედრას ნაყოფიერს უწოდებს.

"ვფიქრობ, მოლაპარაკებების საფუძველზე უკვე მიმდინარე წელს ვიხილავთ WizzAir-ის ახალ მიმართულებებს ქუთაისის აეროპორტში, რასაც ძალიან პოზიტიური ზეგავლენა ექნება ჩვენი ქვეყნის ტურიზმის დინამიკის ზრდაში და რაღა თქმა უნდა, ავიაციის სექტორის გაძლიერებაში", - აღნიშნა მარიამ ქვრივიშვილმა.

ეკონომიკის მინისტრის მოადგილის თქმით, სტრატეგიული პარტნიორი ავიაკომპანია WizzAir-ის ტოპ მენეჯმენტი საქართველოში ქართული მხარის მოწვევით იმყოფება. ვიზიტის ფარგლებში მათ დაათვალიერეს ქუთაისის განახლებული საერთაშორისო აეროპორტი, ასევე ადგილზე გაეცნენ ქუთაისის საერთაშორისო აეროპორტთან მდებარე სარკინიგზო სადგურის მიმდინარე სამშენებლო პროცესს, რომელიც ძალიან მალე დასრულდება.