თბილისი (GBC) - ივნისში აშშ-ის სამომხმარებლო ფასების ინდექსი, წინა წლის შესაბამის პერიოდთან შედარებით, 9.1%-ით გაიზარდა, რაც ინფლაციის ყველაზე მაღალი ნიშნულია 1981 წლის შემდეგ.

ამერიკელი ექსპერტები ამ მოვლენას ,,ფასების დაუნდობელ ზრდას’’ უწოდებენ.

რაც შეეხება თვიურ ინფლაციას, მაისთან შედარებით ფასები 1.3%-ით არის გაზრდილი, რაც ბოლოს 2005 წელს დაფიქსირდა. ფასების განსაკუთრებული ზრდა იგრძნობა საწვავზე, საცხოვრებელ და სურსათის ფასებზე.

სააგენტო Bloomberg-ის ანალიტიკოსების აზრით, რეკორდული ინფლაცია ფედერალურ სარეზერვო სისტემას საპროცენტო განაკვეთის მნიშვნელოვანი აწევისკენ უბიძგებს, უკვე ივლისის მიწურულს.

ეკონომისტები აშშ–ში თვიური ინფლაციის ზრდას 1,1%–ით ვარაუდობდნენ, ხოლო წლიურ გამოსახულებაში – 8,8% იყო მოსალოდნელი. Bloomberg–ის ცნობით, უკვე მეოთხე თვეა, რაც აშშ–ში წლიური ინფლაციის მაჩვენებელი პროგნოზებს აღემატება.