თბილისი (GBC) - თურქეთში მეორე კვარტალში ტურიზმიდან შემოსავალი 190,2%–ით გაიზარდა 2021 წლის ანალოგიურ პერიოდთან შედარებით და $8,71 მლრდ შეადგინა. ამის შესახებ ინფორმაციას თურქეთის სტატისტიკის ინსტიტუტის მონაცემებზე დაყრდნობით სააგენტო ანადოლუ ავრცელებს.

თურქსტატის მონაცემებით, ტურიზმის შემოსავლებში 83,8%–იანი წილი უშუალოდ უცხოელ ტურისტებზე მოდის, ხოლო 16,2% უცხოეთში მცხოვრებ თურქეთის მოქალაქეებზე.

ტურისტების მიერ პირადი საჭიროებებისთვის გაწეულმა ხარჯებმა საანგარიშო პერიოდში $6,2 მლრდ–ს გადააჭარბა, ხოლო ტურპაკეტებზე გაწეულმა ხარჯებმა $2,44 მლრდ–ზე მეტი შეადგინა.

ტურისტების საშუალო ხარჯმა ერთ სულზე დღე–ღამეში ამ პერიოდში $78 შეადგინა.