თბილისი (GBC) - სომხეთში ინფლაციის წლიურმა მაჩვენებელმა ივლისში 8.3% შეადგინა, წინა თვესთან შედარებით მატება 0.2% იყო.

მეზობელ ქვეყანაში სურსათის ინფლაციურმა ნიშნულმა 13.7%-ს მიაღწია. პურპროდუქტებსა და მარცვლეულზე ფასები 20.6%-ით გაიზარდა. ფქვილზე 18%-ით, პურზე 21.2%-ით, შაქარზე 7.5%-ით, სიმინდზე კი 28.6%-ით.

წყლის, გაზის, ელექტროენერგიის და სხვა კომუნალური მომსახურების ტარიფები 5,7%-ით გაიზარდა. ბენზინზე და დიზელზე ფასები გაიზარდა 11.6%-ით  და 43.2%-ით.

იმპორტირებულ საქონელზე ინფლაციის საშუალო დონე 20% დაფიქსირდა.

News.am-ის ინფორმაციით, საზღვარგარეთიდან ფულადი გზავნილების მიმღებ ოჯახთა მდგომარეობა გაუარესებულია. სააგენტო წერს, რომ საქონელზე ფასები გაიზარდა, დრამში შემოსავლები კი 20 %-ით შემცირდა.

„გამოდის, რომ ცენტრალური ბანკი სერიოზულ ზიანს აყენებს ექსპორტიორებს და ვერ ახერხებს ინფლაციის შენარჩუნებას მიზნობრივ 4%-ზე’’, - წერს News.am.