თბილისი (GBC) - სამშაბათს, 16 აგვისტოს, ოდესის ორი პორტიდან უკრაინული მარცვლეულით დატვირთული კიდევ 5 გემი გავიდა. ამის შესახებ RBC-Ukraine თურქეთის ეროვნული თავდაცვის სამინისტროზე დაყრდნობით წერს.

„სულ უკრაინის პორტებიდან ხორბლითა და სიმინდით დატვირთული 5 გემი გავიდა, ორი „იუჟნიდან“ ხოლო 3 „ჩერნომორსკიდან“, – ნათქვამია თურქეთის თავდაცვის უწყების განცხადებაში.

სამშაბათსვე ერთობლივი საკოორდინაციო ცენტრი ოთხი გემის ინსპექტირებას მოახდენს, რომლებიც შემდეგ უკრაინის პორტებისკენ გაემართებიან.

უკრაინიდან აღნიშნული პროდუქტის ექსპორტი „მარცვლეულის შეთანხმების“ ფარგლებში ხორციელდება, რომელიც უკრაინას, რუსეთს, თურქეთსა და გაეროს მონაწილეობით გაფორმდა.