თბილისი (GBC) – აშშ უკრაინას უმსხვილეს სამხედრო დახმარების პაკეტს გამოუყოფს, რომლის ღირებულება $3 მლრდ–ს აღწევს. ამის შესახებ RBC-Ukraine პრეზიდენტ ჯო ბაიდენის განცხადებაზე დაყრდნობით წერს.

ამერიკის ლიდერმა უკრაინას დამოუკიდებლობის დღე მიულოცა და კიდევ ერთხელ დაადასტურა ვაშინგტონის მხრიდან მხარდაჭერა.

„დღევანდელი დღე არის არა მხოლოდ წარსულის ზეიმი, არამედ იმის ხმამაღალი დასტური, რომ უკრაინა ამაყად რჩება და დარჩება სუვერენულ და დამოუკიდებელ სახელმწიფოდ“, – აღნიშნა ბაიდენმა.

უკრაინის დამოუკიდებლობის დღესთან დაკავშირებით თეთრმა სახლმა უკრაინისთვის რუსეთის შეჭრის შემდეგ ყველაზე მსხვილი სამხედრო დახმარების პაკეტის დამტკიცების შესახებ განაცხადა და უკრაინის უსაფრთხოების მხარდაჭერის ინიციატივის ფარგლებში $2,98 მლრდ–ს გამოყოფს.

ეს უკრაინელებს დაეხმარება საჰაერო თავდაცვის სისტემების, არტილერიის, უპილოტო საავიაციო კომპლექსების, რადარების და სახარჯი მასალის მიღებაში.