თბილისი (GBC) – NASA 29 აგვისტოს გეგმავს მძიმე ახალი თაობის რაკეტის (SLS) კოსმოსურ ხომალდ Orion-თან წყვილში გაშვებას, რომელიც ეკიპაჟის გადასაყვანადაა განკუთვნილი. ამ ეტაპის შემდეგ კი მთვარეზე ასტრონავტებს გაგზავნიან, წერს სააგენტო Reuters.

„სტარტისთვის მზად ვართ“, – განაცხადა NASA–ს ხელმძღვანელის მოადგილემ ბობ კაბანამ.

მისია Artemis I (SLS–ისა და Orion–ის წყვილი) სტარტს ფლორიდიდან აიღებს, კენედის სახელობის კოსმოსური ცენტრიდან, რომელიც კანავერალის კონცხზე მდებარეობს. კოსმოსური ხომალდი მთავრის ორბიტაზე 6 კვირას დარჩება და შემდეგ დედამიწაზე დაბრუნდება. ეს რაკეტისთვის სტრეს–ტესტი იქნება. თუ ყველაფერი კარგად ჩაივლის, მას ამის შემდეგ დედამიწის თანამგზავრზე ასტრონავტების გადასაყვანად გამოიყენებენ. ეს კი, გეგმის თანახმად, 2025 წელს უნდა მოხდეს.