თბილისი (GBC) – ტყვეების გაცვლა, უგზოუკვლოდ დაკარგულთა ბედის გარკვევა, დემარკაცია და სასაზღვრო უსაფრთხოება, რეგიონის განბლოკვა, აზერბაიჯანსა და სომხეთს შორის ურთიერთობების დარეგულირება და მთიანი ყარაბაღის პრობლემატიკა – ეს საკითხები განიხილეს აზერბაიჯანისა და სომხეთის ლიდერებმა ილჰამ ალიევმა და ნიკოლ ფაშინიანმა ბრიუსელში ევროპის საბჭოს თავმჯდომარის შარლ მიშელის შუამდგომლობით 31 აგვისტოს გამართულ შეხვედრაზე. ალიევსა და ფაშინიანს შორის ეს რიგით მეოთხე შეხვედრა იყო.  

შარლ მიშელმა შეხვედრის დასრულების შემდეგ პრესისთვის განცხადება გააკეთა:

„როგორც ჩვენს ბოლო შეხვედრაზე შევთანხმდით, რომელიც მაისში გაიმართა, დღეს მივიღე აზერბაიჯანის პრეზიდენტი ალიევი და სომხეთის პრემიერი ფაშინიანი. ამ ფორმატში ეს ჩვენი მეოთხე შეხვედრა იყო. ჩვენი საუბარი სამხრეთ კავკასიაში შექმნილ ვითარებას და ამ ორი ქვეყნის ევროკავშირთან ურთიერთობების საკითხებს შეეხო. ჩვენი საუბარი იყო ღია და პროდუქტიული, რისთვისაც ორივე ლიდერს მადლობას ვუხდი“.

სომხეთის მთავრობის პრეს–სამსახურის ცნობით, მხარეები შეთანხმდნენ საგნობრივი მოლაპარაკებების გაგრძელებაზე საგარეო მინისტრების დონეზე და სამშვიდობო შეთანხმების დოკუმენტის შემუშავებაზე. საგარეო საქმეთა მინისტრების მორიგი შეხვედრა თვის განმავლობაში გაიმართება.

სახელმწიფო საზღვრის დელიმიტაციისა და სასაზღვრო უსაფრთხოების საკითხთა კომისიის მორიგი სხდომა კი ნოემბერში ბრიუსელში გაიმართება. ხოლო ალიევი და ფაშინიანი ერთმანეთს ნოემბერში შეხვდებიან.