თბილისი (GBC) – ესტონეთის, ლატვიის, ლიეტუვისა და პოლონეთის სახმელეთო საზღვრებზე რუსეთის მოქალაქეებს 19 სექტემბრიდან აღარ შეუშვებენ. ესტონეთის საგარეო საქმეთა მინისტრმა ურმას რეინსალუმ განაცხადა, რომ 19 სექტემბრის 00:00 საათიდან ამ ქვეყნების ტერიტორიებზე ვეღარ მოხვდებიან რუსები, იმისდა მიუხედავად, რომელი ქვეყნისგან აქვთ მიღებული შენგენის ვიზა.

„არ ჩამოხვიდეთ ესტონეთში შენგენის ვიზებით, თქვენ აქ სიხარულით არ დაგხვდებიან“, – მიმართა რუსებს ესტონელმა მინისტრმა. რეინსალუმ დასძინა, რომ აკრძალვა ტურისტული ვიზებით მოგზაურებს შეეხება და არ ვრცელდება იმ პირებზე, რომელთაც ქვეყანაში შესვლა ნათესავების მონახულების და სხვა ჰუმანიტარული მიზეზებით სურთ.