თბილისი (GBC) – თურქული ნაციონალური ავიაგადამზიდი Turkish Airlines (THY) საერთაშორისო რეისებზე ადგილების რაოდენობით მსოფლიოში უმსხვილეს ავიაკომპანიად დაასახელეს. ამის შესახებ ინფორმაციას THY–ს პრეს–სამსახური ავრცელებს.

„ჩვენი კომპანია პანდემიით გამოწვეული კრიზისის დროსაც გამართულად მუშაობდა. მოხარული ვართ, რომ პოსტკრიზისულ პერიოდში ახალ წარმატებებს ვაღწევთ. ჩვენი მიზანია, მოკლე დროში შევძლოთ 2019 წლის მაჩვენებლების გაუმჯობესება. ჩვენთან 65 000 ადამიანია დასაქმებული და აგვისტოს მაჩვენებლებით მსოფლიოში პირველ ადგილზე გავედით, საერთაშორისო რეისებზე შეთავაზებული ადგილების რაოდენობით“, – ნათქვამია კომპანიის აღმასრულებელი კომიტეტის ხელმძღვანელის ახმეტ ბოლათის განცხადებაში.

ივლის–აგვისტოში ავიაკომპანიამ საკუთარი რეკორდი გააუმჯობესა და თვითმფრინავების დატვირთულობა 14%–ით გაიზარდა.

ივლისსა და აგვისტოში ავიაკომპანიამ დაახლოებით თანაბარი რაოდენობის – 7,8 მლნ მგზავრი გადაიყვანა.