თბილისი (GBC) - 2017 წლის შემდეგ პირველად შპს ,,მარაბდა–კარწახის რკინიგზა’’ მოგებაზეა.

ფინანსური ანგარიშგების თანახმად, 2021 წელს კომპანიამ 123.9 მლნ ლარის მოგება დააფიქსირა. 2020 წელს კი კომპანიის ზარალი რეკორდულ 382.5 მლნ ლარს შეადგენდა.

კომპანიამ 10.2%-ით გაზარდა აქტივები და 2021 წლის მდგომარეობით ის 1.8 მლრდ ლარს შეადგენს.

ამ პერიოდში კომპანიას 10.1%-ით შეუმცირდა კაპიტალი და 1.1 მლრდ ლარი შეადგინა.

კომპანიამ 11.4%-ით – 4,8 მლრდ ლარამდე გაზარდა თანამშრომელთა ხელფასები.

კომპანია 2007 წელს დაარსდა და მისი 100% წილის მფლობელია სახელმწიფო.

კომპანიის ძირითადი საქმიანობაა პირდაპირი სარკინიგზო ხაზის გაყვანა საქართველოს ტერიტორიაზე, რომელიც ერთმანეთთან დააკავშირებს აზერბაიჯანისა და თურქეთის სარკინიგზო ქსელებს. 2021 წლის 31 დეკემბრის მდგომარეობით, სარკინიგზო ინფრასტრუქტურა შენდება და მისი ექსპლუატაციაში შესვლა იგეგმება პროექტის დასრულების შემდეგ. პროექტის დასრულების საწყისი თარიღი იყო 2014 წელი. კონტრაქტორებთან გაფორმებული საბოლოო შეთანხმების მიხედვით, პროექტის დასრულების თარიღად განსაზღვრულია 2022 წლის 31 დეკემბერი. პროექტის დასრულების თარიღი გადავადდა რამდენიმე ძირითადი მიზეზის გამო, კერძოდ: კლიმატური პირობები, რთული რელიეფი, მყარი ნიადაგი და სხვა ფორსმაჟორული სიტუაციები.