მთავრობამ სახელმწიფო ქონების ეროვნულ სააგენტოსა და შპს „გრანატს" შორის გასაფორმებელი ხელშეკრულება უკვე მოიწონა.

ახალი ხელშეკრულების მიხედვით, კოსტავას/ბოცვაძის ქ. №41/2-ში ხუთვარსკვლავიანი, მინიმუმ 120 სასტუმრო ნომერზე გათვლილი სასტუმროს ექსპლუატაციაში შეყვანა  „გრანატმა" 4 წლის ვადაში  უნდა მოახდინოს.

ინვესტორი ვალდებულია მშენებლობისათვის/რეკონსტრუქციისათვის საჭირო ნებართვები 11 თვის ვადაში მოიპოვოს, ხოლო მშენებლობა, შესაბამისი ხელშეკრულების გაფორმებიდან 13 თვის ვადაში დაიწყოს.

ამასთან, ინვესტორმა სასტუმრო ოფიციალურად 48 თვის ვადაში უნდა გახსნას.

პროექტის განხორციელებისთვის კი „გრანატი" 20 მლნ აშშ დოლარის ინვესტიციას დახარჯავს.  უნდა უზრუნველყოს ასევე, არანაკლებ 52 თვის ვადით მოქმედი, 10 მლნ  აშშ დოლარის ოდენობის საბანკო გარანტიის წარდგენაც.

შეგახსენებთ, რომ ამ შენობაში  "ინტერკონტინენტალის" ბრენდით სასტუმროს „ჯორჯიან ფროპერთი" აშენებდა.

პირველადი საპრივატიზაციო ხელშეკრულების თანახმად, სასტუმროს მშენებლობა 2008 წელს უნდა დაწყებულიყო, თუმცა, ამის შემდგომ ინვესტორის მხრიდან პირობა რამდენჯერმე ვერ შესრულდა და  ხელშეკრულებაც გადაიხედა.

მთავრობის ახალ განკარგულებაში აღნიშნულია, რომ „ჯორჯიან ფროპერთის" 2007 წლის 15 იანვარს დადებული უძრავი ქონების ნასყიდობის ხელშეკრულების საფუძველზე დაკისრებული/დასაკისრებელი პირგასამტეხლო ეპატია.

მიიღებს თუ არა რაიმე ფორმით სასტუმროს მშენებლობაში მონაწილეობას „ჯორჯიან ფროპერთი" უცნობია, ქონების მართვის სააგენტოში არ აკონკრეტებენ რა პირობით გადასცა კომპანიამ უძრავი ქონება „გრანატს".

აღსანიშნავია, რომ შპს „გრანატი" 2014 წლის 21 ოქტომებრს არის დაფუძნებული. კომპანიის 50% უზბეკეთის მოქალაქეს შომუროდ ილიასოვს ეკუთვნის,  25% -25% კი, მერაბ ჩიხრაძე და  „ჯი ეს ეი ინვესტი" ფლობს, რომელის 100%-იანი წილი დიმიტრი აბდუშელიშვილს ეკუთვნის.