თბილისი (GBC) - 2015 წელს BP-იმ 6,5 მლრდ აშშ დოლარის ზარალი  მიიღო. წმინდა ზარალი კი, 6,48 მლრდ აშშ დოლარს შეადგენს, ამასთან, მხოლოდ მეოთხე კვარტალში კომპანიამ 3,3 მლრდ აშშ დოლარზე მეტი დაკარგა.

Reuters-ის ცნობით, ასეთი დანაკარგები BP-ს 2010 წელს, მექსიკის ყურეში არსებულ პლატფორმაზე მომხდარი კატასტროფის  დროსაც კი არ მიუღია. ზარალის მოცულობამ მაშინ 3,719 მლრდ აშშ დოლარი შეადგინა. 2014 წელს კი, კომპანიის მოგებამ 4 მილიარდს გადააჭარბა.

უარყოფითი ფინანსური მაჩვენებლების მთავარი მიზეზი ნავთობზე ფასების ჩამოშლაა. ექსპერტების გათვლებით, Brent -ის მარკის ნავთობის 1 აშშ დოლარით შემცირება  BP-ის შემოსავალს 300 მილიონით ამცირებს.

BP აღნიშნავს, რომ უახლოეს პერიოდში ნავთობის ფასებთან დაკავშირებული ვითარება რთული იქნება.

Reuters-ის ცნობით, კომპანია  2017 წლის ბოლოსთვის, ხარჯების 2,5 მლრდ აშშ დოლარით  შემცირებას გეგმავს, რისთვისაც სამუშაო ადგილებს შეამცირებს.