თბილისი (GBC) – „საქართველოს ჯანდაცვის ჯგუფმა“ (GHG) 2015 წელს რეკორდული წმინდა მოგების მიღებაზე განაცხადა.

კომპანიის ცნობით, ჯგუფმა გასული წელი 23,6 მლნ ლარის წმინდა მოგებით დაასრულა, რაც შესაბამისად  9,9 მლნ აშშ დოლარი/ 6,7 მლნ ფუნტი სტერლინგია. წლიური ზრდა 78%-ს შეადგენს.

1 აქციაზე მოგებამ 0,15 ლარი ($0.06/ GBP 0,04) შეადგინა.

აღსანიშნავია, რომ ჯგუფის კონსოლიდირებული წმინდა მოგება მეოთხე კვარტალში 5,1 მლნ ლარი იყო, რაც წლიურად 435.2%-ით არის გაზრდილი და კვარტალურად 3.7%-ით შემცირებული.

ფინანსური ანგარიშის მიხედვით, კომპანიის შემოსავალი 22,5%-ით 242,7 მილიონამდე გაიზარდა.

2015 წლის 31 დეკემბრის მდგომარეობით, კომპანიაში შედის 2,670 საწოლზე გათვლილი, 45 სამედიცინო დაწესებულება. ჯანდაცვის ბაზარზე საწოლების მიხედვით კომპანიის წილი 26,6% შეადგენს.

ჯგუფში შემავალი სადაზღვევო კომპანია „იმედი ელ“-ის მიერ დაზღვეულია  234 000 პირი.  სამედიცინო დაზღვევის ბაზარზე, წმინდა სადაზღვევო პრემიიდან მიღებული შემოსავლის მიხედვით, კომპანიის წილი იყო 38,4%.

შეგახსენებთ, „საქართველოს ჯანდაცვის ჯგუფი“  2015 წლის ნოემბრიდან, ლონდონის საფონდო ბირჟის პრემიუმ ლისტინგში, წარმატებით ივაჭრება.