თბილისი (GBC) - ამერიკისა და ევროპის შემდეგ, ბიტკოინ-ბანკომატები საქართველოშიც გამოჩნდება.

 "კომერსანტთან" საუბრისას BitFury Group-ის ხელმძღვანელი ეფრემ ურუმაშვილი აცხადებს, იგეგმება 2 ბანკომატის ჩამოტანა, ერთი - თბილისის საერთაშორისო აეროპორტში დამონტაჟდება, მეორე კი დედაქალაქის ცენტრალურ უბანში, რათა ის ტურისტებისთვისაც ხელმისაწვდომი იყოს. 

"ბიტკოინ-ბანკომატების განთავსების იდეა ახლახანს გაგვიჩნდა. უკვე გადაწყვეტილი გვაქვს, რომ ასეთი 2 ბანკომატი ჩამოვიტანოთ. ამ ეტაპზე მიმდინარეობს განხილვა იმის, ხომ არ მოდის ასეთი ბანკომატების განთავსება საქართველოს კანონმდებლობასთან წინააღმდეგობაში. თუ ეს ასე არ არის, ბიტკოინ-ბანკომატები თბილისში მალე გამოჩნდება", - ამბობს ურუმაშვილი.  

მისივე თქმით, ბიტკოინ-ბანკომატებში მოხდება როგორც ელექტრონული კრიპტოვალუტის შეძენა, ასევე ბიტკოინების განაღდება. 

აღსანიშნავია, რომ ბიტკოინ-ბანკომატები ბოლო პერიოდში მსოფლიოში საკმაოდ პოპულარული გახდა. 

CoinATMRadar-ის ნომაცემებით, მთელს მსოფლიოში 740-ზე მეტი ბიტკოინ-ბანკომატი მოქმედებს. მათი უმეტესობა, 387 ერთეული ამერიკაშია. ევროპაში კი მთლიანი რაოდენობის 23%-ია განთავსებული.