თბილისი (GBC) -  50 ლარიანი ბანკნოტი  International Bank Note Society -ის (IBNS) ბანკნოტების "ოსკარის“ ნომინანტია. 

ლარის წარდგენისას Bloomberg-ი აღნიშნავს, რომ ბანკნოტის წინა მხარეს თამარ მეფეა გამოსახული, რომლის მეფობის პერიოდს საქართველოში "ოქროს ხანას" უწოდებენ. აღნიშნულია, რომ ბანკნოტზე გამოსახულია შუა საუკუნეების ხატწერის ელემენტები.

ქართული კუპიურას კონკურენციას შვეიცარული 50 ფრანკის ბანკნოტი, ავსტრალიური 5 დოლარიანი, ბრიტანული 5 ფუნტიანი, ახალ ზელანდიური 50 დოლარიანი და მალდივური 1000 რუპია გაუწევენ. 

ბანკნოტების შეფასებისას გათვალისწინებულია, როგორც მათი უსაფრთხოება ასევე დიზაინი.

აღსანიშნავია, რომ რეიტინგს IBNS 2005 წლიდან აქვეყნებს.  

შეგახსენებთ, განახლებული ლარი მიმოქცევაშია 2016 წლის 1 თებერვლიდან.  

განახლებული 20, 50 და 100 ლარიანი ბანკნოტების დიზაინის ავტორია ქართველი მხატვარი ბაჩა მალაზონია.

საქართველოს ეროვნულ ბანკში შემუშავებული განახლებული ბანკნოტების ესკიზების სრულყოფაში მონაწილეობდნენ მსოფლიოს წამყვანი კომპანიები: Giesecke & Devrient (გერმანია), Oberthur Fiduciaire (საფრანგეთი) და De La Rue (ინგლისი).