თბილისი (GBC) - გასული წელი ღვინის ექსპორტის მხრივ წარმატებული აღმოჩნდა.

ღვინის ეროვნული სააგენტოს მონაცემებით, საქართველოდან მსოფლიოს 53 ქვეყანაში ექსპორტირებულია 50 მლნ-მდე ბოთლი (0,75 ლ) ღვინო, წლიურად ზრდა 38%-ია.

გაზრდილია ღვინის ექსპორტიდან შემოსავალიც, 16%-ით, 113.8 მლნ აშშ დოლარამდე.

ექსპორტის მატება აღსანიშნავია ევროკავშირის, ჩინეთის, აშშ-ს და სხვა ტრადიციული ბაზრების მიმართულებით: 

ექსპორტიორი ქვეყნების პირველი ხუთეული ასე გამოიყურება: რუსეთი (27 222 076 ბოთლი), უკრაინა (5 811 050), ჩინეთი (5 299 149), ყაზახეთი  (3 393 435) და პოლონეთი (2 329 820).

აღსანიშნავია, რომ ჩინეთში ღვინის ექსპორტის ზრდამ 98%  შეადგინა,  უკრაინაში - 70%, რუსეთში -  49% , პოლონეთში - 46%.

რაც შეეხება სხვა ქვეყნებს კანადა - 34% (210 936), ბელარუსი - 30% (1 174 362), დიდი ბრიტანეთი - 28% (97 226), ესტონეთი - 25% (631 632), ყირგიზეთი - 24% (230 776), აშშ - 19% (294 382), ლატვია - 19% (1 258 632),  იაპონია - 15% (159 654), გერმანია - 6% (292 454), ჩეხეთი - 353% (119 648) და სხვა.         

ექსპორტირებულ ადგილწარმოშობის დასახელების ღვინოებს შორის პირველ ადგილს იკავებს „ქინძმარაული“ – 7 417 333 ბოთლი, შემდეგ ხუთეულში მოდის „მუკუზანი“ – 2 568 547, „წინანდალი“ – 2 023 915, „ახაშენი“ – 923 780 და „ხვანჭკარა“ – 413 823 ბოთლი.