თბილისი (GBC) -  თიბისი ბანკი კიდევ ერთი მაღალი დონის მენეჯერით გაძლიერდა. 

ბანკის გენერალური დირექტორის მოადგილედ და რისკების მართვის მთავარ ოფიცრად დავით ჭყონია დაინიშნა.

ბანკის განცხადებით, ჭყონია 15 წლიან საერთაშორისო გამოცდილებას შესძენს თიბისის რისკების მართვის მიმართულებით.

დავითი ამ დრომდე დირექტორის პოზიციას იკავებდა  BlackRock Solutions Group-ში. ის ასევე წამყვან პოზიციებზე მუშაობდა European Resolution Capital-ში, Goldman Sachs-სა და  EBRD-ში.

დავით ჭყონია ფლობს სან-ხოსეს უნივერსიტეტის ბაკალავრის ხარისხს და პენსილვანიის უნივერსიტეტის უარტონის სკოლის ბიზნესის ადმინისტრირების მაგისტრის ხარისხს.

„ჩვენთვის ძალიან სასიხარულოა, რომ დავით ჭყონია თიბისი ბანკის დირექტორთა საბჭოს შემოუერთდა რისკების მართვის დირექტორის პოზიციაზე. მას მდიდარი გამოცდილება აქვს ფინანსური სერვისებისა და რისკების მართვის მიმართულებით. დარწმუნებული ვარ, რომ დავითი დიდ წვლილს შეიტანს ბანკის შემდგომ ზრდასა და განვითარებაში“, - განაცხადა თიბისი ბანკის გენერალურმა დირექტორმა, ვახტანგ ბუცხრიკიძემ.

დავით ჭყონიამ თიბისი ბანკის რისკების მართვის დირექტორის პოსტზე გოგა თხელიძე ჩაანაცვლა, რომელიც თიბისი ბანკის კორპორატიული და საინვესტიციო საბანკო ბიზნესის მართვის  ხელმძღვანელად  დაინიშნა.