თბილისი (GBC) - „ვისოლ ჯგუფში" შემავალი, სუპერმარკეტების ქსელი „სმარტი" ობიექტებს ხურავს, - ინფორმაციას „კომერსანტი“  ავრცელებს, აღნიშნავს, რომ მათ მიერ მოპოვებული ინფორმაციით, საქართველოში ერთ-ერთ ყველაზე მსხვილ რითეილს გადახდასთან დაკავშირებით პრობლემები აქვს.

მათივე ინფორმაციით იხურება „სმარტის" გლდანის და ვაზისუბნის ფილიალები, ასევე რუსთაველის გამზირზე, ფოსტის ყოფილ შენობაში განთავსებული სუპერმარკეტი და სამივე ობიექტზე ოპერირებას Carrefour-ი იწყებს.

„ვისოლ ჯგუფში" „სმარტის" ვაზისუბნისა და რუსთაველის ფილიალების დახურვა კატეგორიულად უარყვეს. რაც შეეხება „სმარტის" გლდანის ფილიალს,  მისი დახურვა და ადგილზე Carrefour-ის გახსნა დაადასტურეს.

კომპანიაში ამბობენ, რომ 2016 წელს მიიღეს სტრატეგიული გადაწყვეტილება, განავითარონ საშუალო ფორმატის მაღაზიები.

„რაც შეეხება გლდანს, ის ჩვენს ქსელში ყველაზე დიდი სუპერმარკეტია და ვინაიდან ეს ჩვენი ნიშა არ არის, გადავწყვიტეთ, რომ ამ სავაჭრო ცენტრში, რომელიც ჩვენი ჯგუფის მფლობელობაშია, ფართი სხვა ოპერატორს მივაქირაოთ. ეს ოპერატორი კი Carrefour-ია , - განუცხადეს „კომერსანტს" „ვისოლ ჯგუფში".

შეგახსენებთ, „ვისოლ ჯგუფთან” აფილირებულმა "ველაჯიომ" უარი თქვა ხაშურში სავაჭრო ცენტრის მშენებლობაზე, ბათუმში არსებული ტერიტორია, სადაც ჯგუფში შემავალი ბრენდების ფილიალები უნდა გახსნილიყო ასევე Carrefour-ს დაუთმო.