თბილისი (GBC) - "ინტერრაო" საქართველოს მთავრობისგან, ლარის გაუფასურების გამო მიყენებული ზარალისთვის, 125 მილიონ დოლარს ითხოვს, - ინფორმაციას Reuters-ი წყაროზე დაყრდნობით ავრცელებს, აღნიშნავს, რომ ეს თანხა 1 მაისის მდგომარეობითაა და შესაძლოა გაიზარდოს.

სააგენტო წერს, რომ რუსული ენერგოკომპანიის ნოდერლანდურმა შვილობილებმა საერთაშორისო საარბიტრაჟო სასამართლოში 2 სარჩელი შეიტანეს.  ერთი ჰესებს „ხრამი 1"-ს და „ხრამი 2“-ს , მეორე კი, „თელასს“ ეხება. კომპანია ამბობს, რომ ლარის გაუფასურებას არ მოჰყოლია ელექტროენერგიის ტარიფების შესაბამისი ზრდა, რის გამოც მათ ათეულობით მილიონის ზარალი მიადგათ.

ენერგეტიკის მინისტრის მოადგილე მარიკა ვალიშვილი Reuters-თან ამბობს, რომ კომპანია ტარიფების ზრდას და კომპენსაციას ითხოვს. ვალიშვილს თანხა არ დაუსახელებია. სარჩელის თანხას არ აკონკრეტებენ არც "ინტერრაოში".

ვალიშვილი აღნიშნავს, რომ ქართულმა მხარემ „ინტერრაოს“ მარეგულირებელ კომისიაში განაცხადის შეტანა შესთავაზა, რათა გაირკვეს "ხრამი 1" და "ხრამის 2"-ის შემთხვევაში მათი პრეტენზიების სამართლიანობა.

"ამ ტარიფების კორექტირება შესაძლებელია, თუ კომისია მიიღებს ასეთ გადაწყვეტილებას“, - განმარტავს ვალიშვილი და დასძენს, რომ კომპანია მერგულირებლისთვის მიმართვას არ ჩქაროს.

მისი თქმით, დავა რომელიც „თელასს“ ეხება უფრო რთულია.

„ინტერ რაოს“ არ ჩაუდია „თელასში“ არანაირი ინვესტიცია, გასულ წელს იმაზე მეტი დივიდენდი აიღო, ვიდრე მოსალოდნელი იყო და რატომ უნდა გადავიხადოთ კომპენსაცია?“, - კითხულობს მარიკა ვალიშვილი და დავაში საქართველოს ძლიერ პოზიციაზე მიუთითებს.

თავის სიმართლეში დარწმუნებულია "ინტერრაოც" - „ან მივიღებთ იმ სატარიფო- საბალანსო გადაწყვეტილებას, რომელიც გათვალისწინებული იყო საქართველოს მთავრობასთან მოლაპარაკებით, ან მივიღებთ სასამართლოს გადაწყვეტილებას“, - განაცხადა “ინტერრაოს” ხელმძღვანელმა ბორის კოვალჩუკმა პარასკევს პრესკონფერენციაზე.

ის ამბობს, რომ იმ ფულის მისაღებად, რაც ეკუთვნის „ინტერრაოს“ ყველა კანონიერი საშუალება იქნება გამოყენებული.