თბილისი (GBC) - დეველოპერული კომპანია RED-CO,  საბაგირო გონდოლას სიახლოვეს, დეკემბერში კიდევ ერთ აპარტ-ოტელს New Gudauri Suites-ს გახსნის, - ინფორმაციას propertygeorgia ავრცელებს. 

გამოცემის ცნობით, New Gudauri Suites-ში 102 აპარტამენტი და ის უკვე არსებულ 400 აპარტამენტს დაემატება. 

ახალი წლის წინა ღამეს კი, რიგით მეხუთე აპარტ-ოტელში, მათთვის, ვინც გუდაურს მხოლოდ სასრიალოდ არ სტუმრობს, Red-co პირველ სამორინეს CASINO GUDAURI -ს გახსნის.

"დამსვენებლის სურვილებზე მორგებულ CASINO GUDAURI-ში გართობა და დროის სასიამოვნოდ გატარება საბაგირო გზების დაკეტვის შემდეგ იქნება შესაძლებელი. . სამორინე საღამოს 6 საათზე გაიხსნება და დილის 4 საათამდე უმასპინძლებს დამსვენებლებს", - აღნიშნავს გამოცემა . 

აღსანიშნავია, რომ კანადური კომპანია Ecosign-ის მიერ შექმნილი, გუდაურის განვითარების გენერალური გეგმის მიხედვით, დეველოპერი 5 წლის განმავლობაში 50 ჰექტარზე 26 ახალი შენობას ააშენებს, რომელთა შორის იქნება 2,3,4,5-ვარსკვლავიანი სასტუმროები, აპარტ-ოტელები, საკუთარი სახლები და კოტეჯები. Red-co New Gudauri Resort Residences & Spa-ს განვითარებაში 150 მლნ აშშ დოლარის ინვესტიციას ახორციელებს.

2018-2019 წლების განმავლობაში გუდაურში პირველი 5-ვარსკვლავიანი გლობალური ბრენდის სასტუმრო Radisson Blu Gudauri აშენდება, 160 ოთახით, რამდენიმე რესტორნით, სპა-კომპლექსით, შიდა და გარე საცურაო აუზებით. სასტუმროს მშენებლობაში დეველოპერი  დაახლოებით 20 მილიონი დოლარს დახარჯავს. რაც შეეხება სხვა მსოფლიო ბრენდებს, Red-co-ს უკვე აქვს წინასწარი თანხმობა Starwood Hotels and Resorts-ის, Sheraton-ისა და Four Points by Sheraton-ისგან გუდაურში ახალი სასტუმროების გახსნაზე.