თბილისი (GBC) -  საქსტატმა საწარმოებში საინფორმაციო-საკომუნიკაციო ტექნოლოგიების გამოყენების კვლევა გამოაქვეყნა.

კვლევით დადგინდა, რომ 2017 წლის 1 იანვრის მდგომარეობით, საწარმოთა 98.4%-ჰქონდა წვდომა ინტერნეტთან.

ამასთან, ინტერნეტთან კავშირის უზრუნველსაყოფად ყველაზე მეტად გამოიყენებოდა ფიქსირებული ფართოზოლოვანი საშუალებები (მაგ. ოპტიკურ-ბოჭკოვანი (FTTH) და საკაბელო ტექნოლოგიები) – 40,2% და DSL კავშირი ( მაგ. x DSL, A DSL, S DSL, V DSL და ა .შ.) – 31,8%.

ამასთან, საწარმოთა 17,3% იყენებდა მობილური ტელეფონების ქსელით ფართოზოლოვან კავშირს (3G,4G), ხოლო 10,6% - სხვა მობილურ სატელეფონო კავშირს (მაგ.GSM, GPRS, EDGE და სხვ.).

აღსანიშნავია, რომ კომპანიები ძირითადად იყენებდნენ სოციალური მედიის ისეთ სახეებს, როგორიცაა სოციალური ქსელი (Facebook, LinkedIn და ა.შ.) – 33,7%, ხოლო საწარმოთა 47,7% საერთოდ არ იყენებდა სოციალური მედიის არანაირ საშუალებას.

სოციალური მედიის გამოყენების უმთავრეს მიზანს წარმოადგენდა, როგორც საწარმოს იმიჯის შექმნა ან თავისი ბაზრის განვითარება (25,5%), ისე რეაგირება კლიენტის შეკითხვებზე, შეხედულებებსა და გამოხმაურებებზე (27,2%).