თბილისი (GBC) - ქართული ლუდის კომპანიის დირექტორის, კახა კოტრიკაძის განცხადებით, "ჩეროს" განვითარებამ მოლოდინს გადააჭარბა.

კომპანიის ტოპ-მენეჯეტი ამბობს, რომ  ნატურალური წვენების ბაზარზე, რომლის პრაქტიკულად 100% იმპორტს ეჭირა, „ჩერომ“ უკვე 15% დაიკავა, მომავალი წლისთვის კი კომპანიას უფრო ამბიციური გეგმები აქვს და წილის 30%-მდე გაზრდას გეგმავს. მისი თქმით, ამ გეგმის განხორციელებისთვის "ჩერო" დამატებით ასორტიმენტს აფართოვებს. წლის ბოლომდე ბაზარზე "ჩეროს" ბროწეულის ნატურალური წვენები გამოჩნდება.

უკვე დაწყებულია მოლაპარაკებები მიმწოდებლებთან და მომავალ წელს დაგეგმილია დამატებით სამი სახეობის წვენის ჩამოსხმა, მათ შორის ატმის და ანანასის.

კოტრიკაძე აღნიშნავს, რომ ყოვეწლიურად მთლიანი ნატურალური წვენების ბაზარი დაახლოებით 16 მილიონი ლიტრითაა წარმოდგენილი.

მისივე თქმით, პარალელურად მიმდინარეობს "ჩეროს" საერთაშორისო ბაზარზე გატანისთვის მოლაპარაკებები. ექსპორტი მომავალი წლისთვის დაიწყება.

საექსპორტო ბაზრებად მოიაზრება აზერბაიჯანი, სომხეთი, თურქეთი,  დსთ-ის ქვეყნები,  ასევე ირანი და არაბეთის გაერთიანებული საემიროები.

კოტრიკაძის თქმითვე, მიდის მოლაპარაკებები ასევე იმ ბაზრებზე, სადაც ზედაზენია წარმოდგენილი - ბალტიისპირა ქვეყნებში.

რაც შეეხება ევროპის ბაზარს, მისი ათვისება შედარებით რთულია, რადგან ჯერ საქართველომ ნატურალური წვენების მწარმოებელი ქვეყნის ისტორია უნდა შექმნას და დაიმკვიდროს თავი.