თბილისი (GBC) -   კომპანია "ფრეგობასმა" თბილისში პირველი სადემონტრაციო ელექტროავტობუსი ჩამოიყვანა. 

კომპანიის ცნობით,  დედაქალაქის მაცხოვრებლებს შეეძლებათ 61 ნომერ მარშრუტზე, სამი კვირის განმავლობაში თავად გატესტონ ეკოლოგიურად სუფთა, უსაფრთხო, უხმაურო და კომფორტული თანამედროვე E-Bus.

“ეს არის სადემონსტრაციო 12 მეტრიანი ავტობუსი, 35 ადგილი + მძღოლი, 100% ელექტრო, მსგავსი ტიპის თანამედროვე ავტობუსი პირველად ჩამოვა საქართველოში, იმედია მსგავსი სიკეთეები არ მოაკლდება ამ ქალაქს და მალე ჯანსაღად შევძლებთ სუნთქვას”, – განაცხადა კომპანიის წარმომადგენელმა მურმან პატარაიამ რადიო “ფორტუნასთან”.

ელექტროავტობუსი თბილისში იმ პროგრამის ფარგლებში ჩამოდის, რომლის მიხედვითაც, საქართველოში ელექტროავტობუსების ამწყობი ქარხნის მშენებლობა უნდა დაიწყოს.

პროექტს “ფრეგობასი” ჩინურ კომპანიასთან ZTE და გერმანულ Eurobus-თან ერთად იწყებს. ამ დროისთვის ტექნიკურ-ეკონომიკური კვლევა ხორციელდება.