თბილისი (GBC) - შსს მომსახურების სააგენტო ქალაქის პირობებში  მართვის მოწმობის პრაქტიკული გამოცდის დასანერგად ემზადება.

უწყებამ B კატეგორიის მსუბუქი ავტომობილებისთვის  რეალურ საგზაო მოძრაობის პირობებში პრაქტიკული გამოცდისთვის პროგრამული და სენსორული  უზრუნველყოფის შესყიდვა 2017 წელს განახორციელა, ახლა კი, დამატებით 170 029  დოლარი გამოჰყო, რითაც სატვირთო ავტომობლებისთვის (C,CE,C1,D,DE,D1) პროგრამული და ტექნიკური უზრუნველყოფის შესყიდვა მოხდება.

ასევე მოხდება აქსესუარებისა და მოწყობილობების დამატება A კატეგორიის ავტოსატრანსპორტო საშუალებებზე.

არსებული იმპულსური სენსორული სისტემის მაკომპლექტებელი ნაწილები და განახლებული პროგრამული უზრუნველყოფა თავსებადია როგორც პროგრამულად, ასევე ფიზიკურად მხოლოდ ამავე მწარმოებლის, სამხრეთ კორეული ფირმის Neo Information Systems-ის ტექნიკასთან. სწორედ ამიტომ სააგენტოს შესყიდვის გამარტივებულად განხორციელება სურს.

აღსანიშნავია, რომ 2000 წელს დაფუძნებული, Neo Information Systems თითქმის ათწლეულის მანძილზე გააჩნია კორეაში მართვის მოწმობის სახელმწიფო საგამოცდო ცენტრებისთვის მართვის მოწმობის გამოცდისა და სწავლების სამუშაო გამოცდილება.

Neo Information Systems (NIS)-ის მიერ შემუშავებული სისტემა მიწოდებულ იქნა ქვეყნებისთვის: რუსეთი, ჩინეთი, ვიეტნამი, ერაყი, მალაიზია, თურქმენეთი, ყირგიზეთი, ლაოსი, ბოტსვანა და დუბაი.

2011 წელს ,,Neo Information Systems”-მა წარმატებით დანერგა საგამოცდო მოედანზე სატესტო სისტემები ავტომატური ტესტირების ცენტრისთვის და 2017 წელს დაამონტაჟა საგზაო ტესტირებების სისტემა „B“ კატეგორიისთვის.

მართვის მოწმობის პრაქტიკული გამოცდის ახალ წესზე გადასვლა 2018 წელს არის დაგეგმილი.