თბილისი (GBC) - ბაქო-თბილისი-ყარსის სარკინიგზო მაგისტრალი შესაძლოა ახალ პუნქტებამდე დაგრძელდეს , - ამის შესახებ თურქულ მედიას თურქმენეთში თურქეთის ელჩმა განუცხადა. 

დიპლომატი ამბობს, რომ შესაბამისი პროექტები თურქულ მხარეს უკვე მომზადებული აქვს.  ამასთან, აღნიშნა, რომ ამ პროექტთან მიერთება ძალიან მომგებიანი იქნება თურქმენეთისთვის. 

"ჩვენ გვაქვს  ბაქო-თბილისი-ყარსის რკინიგზის დაგრძელების გეგმა. ეს მარშრუტი  სტრატეგიული მნიშვნელობისაა როგორც თურქეთის,  ასევე თურქმენეთისთვის. აშხაბადს ექსპორტზე გააქვს ნავთობი და გაზი  და მათ სურთ ამ სეგმენტიდან შემოსავლების გაზრდა", - განაცხადა ელჩმა და აღნიშნა, რომ გაზის მარაგი თურქმენეთში 26 მილიარდ კუბ. მეტრად არის შეფასებული. 

შეგახსენებთ, ბაქო- თბილისი-ყარსის მაგრისტრალი 2017 წლის 30 ოქტომბერს გაიხსნა. პროექტი ჯერ კიდევ არ არის დასრულებული, თუმცა სატვირთო გადაზიდვები უკვე ხორციელდება. აზერბაიჯანი წელს ამ მაგისტრალით 4000 -მდე კონტეინერის გადაზიდვას პროგნოზირებს.