თბილისი (GBC)- ევროკავშირმა ანაკლიის ღრმაწყლოვანი პორტის €233 მილიონით დააფინანსების გადაწყვეტილება მიიღო.

ამასთანავე, ევროკავშირი მზადაა, სახელმწიფოსთვის €100 მილიონის დაფინანსება გამოყოს, რაც ღრმაწყლოვან პორტამდე მისასვლელი გზისა და რკინიგზის მშენებლობას უნდა მოხმარდეს.

ინფორმაციას BM.ge ავრცელებს.  

საინვესტიციო დაფინანსება ევროკავშირის ახალი პროექტის “ტრანს-ევროპული სატრანსპორტო კავშირის” ფარგლებში მოხდება, რის შესახებაც ევროკავშირის მიერ გამოქვეყნებულ პროექტში არის აღნიშნული. 

პროექტი აღმოსავლეთ სამეზობლოს 6 ქვეყანაში უკრაინაში, მოლდოვაში, ბელორუსში, საქართველოში, სომხეთსა და აზერბაიჯანში უმთავრეს ინფრასტრუქტურულ პროექტებს დააფინანსებს. 

“ტრანს-ევროპული სატრანსპორტო კავშირის” ღირებულება 12.8 მილიარდი ევრო იქნება. 

საქართველოს ქვეთავში დასახელებული პროექტების ჩამონათვალი ასეთია: 

ანაკლიის ღრმაწყლოვანი პორტის მეორე ფაზა - 233 მილიონი ევრო, პარტნიორობის ტიპი PPP; 
სარკინიგზო მაგისტრალი ანაკლიის ღრმაწყლოვან პორტამდე - 100 მილიონი ევრო; 
ჩუმათელეთი-არგვეთის მაგისტრალის მშენებლობა - 1 მილიარდი ევრო;
გრიგოლეთი-ფოთის ხიდის მშენებლობა - 25 მილიონი ევრო; 
გრიგოლეთი-ქობულეთის მაგისტრალის მშენებლობა - 101 მილიონი ევრო; 
ბათუმის შემოვლითი გზა - 115 მილიონი ევრო; 
ქუთაისის აეროპორტის სატვირთო ტერმინალი - 61 მილიონი ევრო; 
რუსთავი-წითელი ხიდის მაგისტრალი - 115 მილიონი ევრო; 
ალგეთი-სადახლოს პროექტი - 90 მილიონი ევრო; 
სადახლოს მეგობრობის ხიდი - 6 მილიონი ევრო. 

აღნიშნული ინვესტიციები მოიცავს როგორც მოკლევადიანი პროექტების განხორციელებას 2020 წლისთვის, ასევე გრძელვადიან პროექტებს, რომელთა დასრულება 2030 წლისთვის იგეგმება.