თბილისი (GBC) - სესხების დაჩქარებით ჩამოწერაზე საუბარი არამხოლოდ არაობიექტურია, არამედ წინააღმდეგობაში მოდის სინდისთანაც, - ამის შესახებ თიბისის ერთ-ერთმა დამფუძნებელმა ბადრი ჯაფარიძემ განაცხადა და აღნიშნა, რომ 2008 წელს საბანკო სექტორმა 800 მილიონი ლარის დაარეზერვა.

მისი თქმით, იმ პერიოდში მსოფლიოს უდიდესი ბანკები ვერ გადარჩნენ სახელმწიფოს ჩარევის გარეშე, გაკოტრდნენ.

„გავიარეთ პერიოდი, როდესაც რუსეთის ჯარი იდგა 30 კილომეტრში, ნებისმიერ მომენტში შემოჭრას ველოდებოდით და ამავე დროს იყო გლობალური ფინანსური კრიზის. იმ დროს სესხები აუცილებლად გაფუჭდებოდა. ყველა კომპანია იყო უკიდურესად მძიმე მდომარეობაში. ბანკსაც არ ჰქონდა უფლება მოეთხოვა სესხის მომსახურება. კონცენტრირება, რომ 17 მილიონის გატანა მოხდა ბალანსს გარეთ,  არასამართლიანია“, - აღნიშნა ჯაფარიძემ.

მისი თქმით, იმ წელს ბანკმა დიდი ზარალი მიიღო. 

"იმ წელს ბანკმა 60 მილონის ზარალით დაასრულა და ვინ იყო აქციონერები,  ვინც პირველ რიგში იზარალა - მე და მამუკა,  80% გვქონდა ბანკის. თეორიულად,  თუ მოგების 80% გეკუთვნის,  მაზოხისტი უნდა იყოს ხელი შეუწყო სესხების  ჩამოწერას შენი მოგების შესამცირებლად“- აღნიშნა ბიზნესმენმა.